لسه مصر بخير !!؟؟

من طرف **Anas Hasan** الأحد 10 مايو 2009, 1:15 am

بصراحة أنا مصدوم فى الموضوع للدرجة دى مفيش حسنات ياخوانا راعوا ضميركم فى الكتابة انتمم مصرين تشوفوا السيئات بس بالله عليكم هل الحوادث اللى ذكرتوها مش موجودة فى اى حته فى العالم ؟راعوا ضميركم شوية وبطلوا النظرات المشخنصة ده أنا حزين جدا بصراحة وعاوز أسالك بقى هل تعليمك فى المدارس الوطنية مش حسنة هل الطرق اللى بتمشى عليها مش حسنة هل المستشفيات اللى بتروحيها مش حسنةهل الجامعة اللى انت فيها مش حسنة هل الملاهى والشواطىء أيا كان انتمائها للقطاع الحكومى أو الخاص مش حسنة وغيره وغيره انت مصريين تنحازوا للنقد الهدام وعاوزين تنحلوا من المسئولية المفروضة عليكم فى تغيرر وضع الوطن للأفضل وثقوا بأن الله لا يغير ما بقوم حتى يغيروا ما بأنفسهم وشوفوا حال العراق ولبنان وسوريا وقارنوا كده بالنعيم اللى احنا فيه ولى عودة لاحقاً ..

سلام عليكم
هو الرد شكله حلو ولكنه في الواقع رد افلاطوني ملتوي على غرار هل الأسد مفترس ؟ إذا كان الأسد مفترس فهل شاهدته يفترس أحدا من قبل ؟ اذا كان الاسد قد افترس 10 اشخاص ورأيتهم بأم عينك فكم نسبة هؤولاء لسكان الأرض الذين لم يفترسهم !! إذا الأسد حيوان غير مفترس !!؟
كلام ملهوش راس من ديل زي ما بيقولوا وتحس انه لوحده منطقي ولكنه ليس له معنى على الاطلاق وغير قابل للاسقاط على الحقائق او البناء عليه

بس تعالوا نبص للموضوع بعين الطائر وناخد زاوية أبعد شوية في النظر للأمر ، الاستاذ اللي اتكلم ده طلب العقلانية في الرد وحساب الأمر والنظر بمنظور سياسي .. وده اللي هارد عليه بيه

1
لما نقول دولة فاحنا بنتكلم عن كيان واحد بيتحكم في عدد كبير من الناس من خلال عدة كيانات أو ما يعرف بالانظمة

2
الانظمة دي هي النظام الاقتصادي ، الصحي ، التعليمي ، الثقافي ، الديني ، السياسي

3
عملية اثبات فشل الانظمة دي مجتمعه منفردة عمليه بسيطة وهاحسبهالك وتعالى ناخدهم نظام نظام

النظام الاقتصادي في مصر يعاني من شرخ كبير في البنية التحتية نتيجة لعمليات الخصخصة وبيع البنوك والفساد اللي تقرير المنظمات الدولية بيشبر لارتفاعه بنسبة 30% عن السنه اللي فاتت وده معدل ضخم ببشاعة .. فبالتالي اانقدر نقول بكل ثقة ان النظام الاقتصادي المصري منهار ويحتاج لإعادة اعمار.

هل يمكن أن تمتلك في الخامسة والعشرين سيارة جيدة وأسرة مستقرة ؟

النظام التعليمي .. طبعا مش محتاج كلام أحب اقول احصائية جميلة جدا لأحد الهيئات المتابعة للتعليم في الأمم المتحدة بتقول ان نسبة ذكاء الطالب المصري بعد التخرج من الجامعة لا تتعدى ال3% كمتوسط !!.. بمعنى انه مش غبي ولكنه انسان غير قادر على الابداع .. يعني ثقافة الوظايف الحكومية بتاعت اللي بتعمله النهارده هتفضل تعمله لحد ما تموت من غير ذرة اضافة عليه .. المناهج مقارنتها بمناهج برة فلا تعتبر مناهج وده مش كلامي ده بحث لجامعة بنسلفانيا كان بيطالب بإلغاء عدة شهادات من الاعتراف الدولي منهم شهادات كبر الجامعات المصرية لإن النظام التعليمي منهار.

النظام الصحي كفاية لما تفتح الحنفية وتشرب مية الصرف الصحي وتشعر بالسعادة كده والانتشاء ولما ييجيلك التهاب سحائي وتروح المستشفى تتعالج ماتلاقيش دوا ولا تلاقي رعاية ولا تلاقي حاجه وتبقى مبسوط كده وراضي عن سيدك وتاج راسك اللي معيشك في نعيم

النظام السياسي خلونا ناخد كلام العالم مش كلامنا .. كفاية ان مصر بتعد من كبرى الدول في انتهاك حقوق الانسان ولا فخر .. كفاية ان مصر تعد من كبرى الدول في عدد معتقلي الرأي ولا فخر .. كفاية تقارير المنظمة العالمية لحقوق الانسان اللي بتقول ان الحرية بتتراجع في مصر بشكل يثير القلق واضيف عليهم الهلع والفزع والاحساس بالخزي

دول اربع انظمة بس من أنظمة الدولة .. وماحبتش اعرض بقيت الانظمة لإني هابقى باطبل في المتطبل ومش هاجيب جديد واكيد حضراتكم تتكلموا احسن مني في بقية الانظمة اللي بتقيم دولتنا المصرية .. يعني ما يعرفش يثبت ان النظام الثقافي منهار ومين مايعرفش يثبت ان النظام الديني ماعادش غير في نفوس الناس وبس

كلام كتير والنتيجة واحده
دولة كافة أنظمتها منهارة .. ماذا تنتظر منها !! لاشيء .. فقط مزيد من الانهيار
دولة كمصر انهارت نظاما نظاما ماذا تتوقع أن يبنيها ؟
أن يستيقظ الفاسد ليكتشف انه افسد فيصلح ؟
أختم كلامي بسؤال سألته لأحد العلماء .. قلتله ممكن نصحى في يوم نلاقي الحكومة دي عقلت وبطلت تسرقنا والدنيا وردي ؟؟
رد علي بآيه كريمة
"إن الله لا يصلح عمل المفسدين"